Прва средба на работната група за животна средина

Притоа, во фокусот на оваа прва работна средба беа ЕУ директивите за квалитет на воздух и нивното имплементирање во нашата земја, како едно потсетување до сите чинители дека воздухот го дишеме 365 дена во годината, а не само во текот на зимскиот период кога темата на аерозагадување е најактуелна.

На средбата учествуваше и заменик министерот за животна средина и просторно планирање, Јани Макрадули кој се осврна на поврзаноста на активностите од Планот за чист воздух со ЕУ директивите. “Загадувањето е проблем што ги мачи скоро сите држави во Европа и во светот, и настаните и конференциите од овој тип овозможуваат да се тестираат и надградуваат директивите, задачите и законите кои ја покриваат оваа област.” - истакна Макрадули нагласувајќи дека без разлика за која држава во светот станува збор, активностите за намалување на загадувањето на воздухот, се исти: стимулирање на енергетска ефикасност, поврзување на централното греење, почисти индустрии, стимулирање на почист јавен транспорт, замена на стари печки со нови. Според него, Планот за чист воздух кој е усогласен со најдобрите решенија осмислени и веќе имплементирани во другите држави е најдобар пример за доследно спроведување на ЕУ директивите.

Целта на работната група е да одржува редовни средби помеѓу претставници на институциите на централно и локално ниво, граѓанските организации, синдикати, академски претставници и претставници на меѓународни организации кои во својата работа се фокусираат на теми од областа на животната средина, за да овозможи платформа за добра комуникација и соработка меѓу истите, како и креирање на план за заедничко делување. Крајна цел е да се идентификуваат чекорите до “Повелбата за животна средина” која ќе ја дефинира улогата, но и одговорноста на сите засегнати страни во остварување на одржлив развој со минимум импакт врз животната средина.