Forumi i Pestë Socio-Ekologjik

Dje në Shkup u mbajt Forumi i pestë Socio-Ekologjik, i organizuar nga Fondacioni Friedrich Ebert – Zyra në Shkup dhe Instituti Progres për Demokraci Sociale. Forumi mblodhi ekspertë vendorë dhe ndërkombëtarë, aktivistë, përfaqësues të shoqërisë civile dhe aktorë politikë rreth temës “Placemaking for Socio-Ecological Justice.”

Ngjarja nisi me një shëtitje edukative në zonën qendrore urbane, ku përmes vëzhgimit, dialogut dhe reflektimit të përbashkët u diskutua mbi hapësirën publike. Qytetarët theksuan nevojën për më shumë gjelbërim, hije, aksesueshmëri dhe përfshirje, si dhe për hapësira publike që mbështesin mirëqenien dhe dinjitetin e komunitetit.

Forumi i këtij viti u fokusua në placemaking si një qasje pjesëmarrëse që e kupton hapësirën publike si një proces të përbashkët shoqëror. Në kushtet e rritjes së pabarazive sociale dhe sfidave mjedisore, kjo qasje u theksua si një rrugë kyçe drejt krijimit të qyteteve të drejta, të gjelbra, gjithëpërfshirëse dhe rezistente.

Programi përfshiu edhe shfaqjen e filmit dokumentar Skopje Remix, i cili përmes nëntë tregimeve paraqet skenat subkulturore të qytetit dhe rolin e tyre në gjallërimin e hapësirave publike.

Përmes punëtorive tematike dhe një panel-diskutimi, pjesëmarrësit punuan mbi koncepte për hapësira publike rezistente ndaj ndryshimeve klimatike, përmirësimin e aksesueshmërisë dhe përfshirjes, si dhe modele për rritjen e efikasitetit energjetik në planifikimin urban. Në diskutime u theksua se hapësira publike duhet të planifikohet sipas nevojave reale të qytetarëve dhe të vihet në funksion të komunitetit.

Forumi i pestë Socio-Ekologjik edhe një herë konfirmoi rëndësinë e hapësirës publike si një burim kyç për rezistencë sociale dhe mjedisore dhe si pikënisje për një transformim urban të drejtë dhe të qëndrueshëm.