Shkupi ishte nikoqir i festivalit të parë feminist rajonal “Një Botë, Një Luftë”

Nga 19 deri më 21 shtator 2025, në Shkup u mbajt festivali i parë feminist rajonal “Një Botë, Një Luftë”, i organizuar nga Fondacioni Friedrich Ebert – Zyra në Shkup. Festivali bashkoi artistë, aktivistë dhe qytetarë rreth një mesazhi të përbashkët për barazi gjinore, solidaritet dhe drejtësi sociale.

Gjatë tre ditëve të festivalit, publiku pati mundësinë të ndjekë një program të pasur në disa lokacione të qytetit – Teatri Kombëtar i Maqedonisë, Javna Soba dhe Parku i Qytetit – i cili përfshinte shfaqje teatrore, performanca muzikore, ekspozita, instalacione artistike dhe performanca.

Festivali u hap me shfaqjen teatrore “Girls”, me regji të Milena Bogavac, pas së cilës vijoi një program i larmishëm artistik me pjesëmarrje të autorëve dhe artistëve nga Maqedonia e Veriut, Serbia, Bosnja dhe Hercegovina, Kroacia, Kosova, Sllovenia, Shqipëria, Ukraina, Zvicra dhe Irani. Dita e fundit, e mbajtur në Parkun e Qytetit, iu kushtua një programi të hapur për të gjitha gjeneratat, me performanca muzikore, ndërhyrje artistike dhe pjesëmarrje aktive të publikut.

Festivali “Një Botë, Një Luftë” theksoi rëndësinë e feminizmit si një luftë për dinjitet, liri dhe mundësi të barabarta për të gjithë. Përmes artit, festivali hapi hapësirë për dialog, solidaritet dhe një vizion të përbashkët për një shoqëri më të drejtë, më të hapur dhe më humane.

Falënderojmë të gjithë artistët, pjesëmarrësit dhe qytetarët që ishin pjesë e festivalit dhe kontribuuan në suksesin e tij.
 

Një botë, një luftë – së bashku krijojmë ndryshim.